完成了2018的一個項目

2018年下半年，媽咪有一個項目要完成。但係，因為太多嘢要兼顧.......｜

本來預算只係幾個禮拜就可以造起嘅呢座三層大廈，因為兩個女要考試溫習，媽咪又有比賽要準備。結果呢座樓嘅完工日期，就一拖再拖......！好彩，終於係2018年完結之前將佢完成。

好快又聖誕

2018年又到尾聲，兩個小女孩突然間醒起要佈置聖誕樹。 於是我喺儲物櫃將聖誕樹同埋裝飾物拎出嚟， 等大家可以一齊佈置。

但係，依家佢哋兩個就有自己嘅主意，要自己佈置。 佢哋已經可以佈置出一棵好靚嘅聖誕樹。長大啦！好多嘢都可以放手畀佢哋做。

除咗佈置聖誕樹之外，聖誕節佢哋最開心，當然就係聖誕月曆啦！ 兩個都一早已經買咗聖誕月曆 ，12月1號即刻就要開始食聖誕月曆嘅朱古力。 其他嘢可能唔記得，但係呢個佢哋就一定記得！妹妹嗰個月曆，係聖誕節之前一日有粒大嘅朱古力㗎！

睇住佢哋一日食一粒，一日食一粒，就提醒埋我聖誕節就到啦。希望佢哋都有一個愉快嘅聖誕節，同埋開開心心咁去迎接新嘅一年與及美好嘅將來！