重拾舊趣

真係好耐無"影相"了。由兩個女出世開始，我就慢慢放低返部相機，慢慢咁又傻起嚟。傻瓜機的確方便，雖然質素係差啲啲，但係始終有相好過無相。再漸漸發覺原來掌握得好，傻瓜都可以偶有佳作。所以，亦只在傻瓜中繼續打滾！可是近日因為要買新的傻瓜代替那毛病多多的老傻瓜而多看了其他相機。

仲記得我第一部相機係隔離屋哥哥幫我哋買嘅Yashica，佢仲配埋 Toshiba 閃燈比我哋用。到我自己出嚟做嘢就儲錢買咗自己買嘅第一部相機。

Nikon嘅FM2，當時未買呢支原厰鏡頭。但十幾年後，數碼相機出現，我亦買咗啲平平哋嘅傻瓜相機試玩。但祗有呢部 Olympus C-700 ultra zoom仲係度，但每次再試玩都要入電。

呢部機我仲記得去過張國榮嘅演唱會影過相，效果仲唔錯，亦係我拍拖時嘅相機。

當單反數碼機開始成熟時，我便留意想入手一部，但我太太比我更快哋送咗部Olympus E-300比我。

直至阿女出世之後，大機全部要讓開，所以又買了傻瓜機影啲女。傻瓜相曾經用過 Canon，Casio，Panasonic 到潛水嘅 Olympus 同靈活嘅 Sony 。傻瓜機主要係比唔小心跌爛同埋夠期自己瓜柴嘅，所以都經歷幾部不同嘅相機。直至對上一部 Sony HX30V，都幾好用。但始終年紀唔細，所以佢亦有問題了，睇咗好多，貴嘅好靚，但咁貴不如買部換鏡嘅相機"完全係我呢類死窮鬼嘅諗法"。結果都係買返部Sony HX99V，貪佢機動性強，又有玩味，隨身帶又唔重。

雖然我呢幾部機仍可以運作，但除咗HX99外，其他機都係退休狀態，除偶爾拎出嚟比佢哋伸展一吓外，都唔會比佢哋操勞。但到認真影嘢嘅時候，真係要有部可以令自己滿意嘅先得。終於，我就買咗Fujifilm 嘅X-S10，呢部機雖然唔係全片幅相機，但係解像力、避震能力同顏色都好好。唯獨對焦仍然不及Sony。不過，以呢個價錢，我已經滿意。亦希望慢慢可以重拾以往週圍去影相，捕捉靚景同有趣影像嘅樂趣。